11-11 төв

11-11 Иргэд, олон нийттэй харилцах төв нь анх БНМАУ-ын Сайд нарын Зөвлөлийн 1957 оны 4 дүгээр сарын 16-ны өдрийн 209 дүгээр тогтоолын дагуу хөдөлмөрчдийн өргөдөл, гомдлыг хүлээн авах, шийдвэрлэх, хүлээн авч уулзах зэрэг ажлыг зохион байгуулах зорилготойгоор байгуулагдаж, улмаар Засгийн газрын Хэрэг эрхлэх газрын Захидал харилцааны хэлтэст харьяалагдан Иргэдийн хүлээн авах байр нэртэйгээр өөрчлөгдөн үйл ажиллагааг тасралтгүй явуулж иржээ.

Иргэдийн санал, хүсэлтийг хүлээн авч, хариу өгөх, шийдвэрлэлтийг хянах мэдээллийн системийг 2012 оны 10 дугаар сард бий болгож иргэдийг сонсох, иргэний нийгмийн оролцоог нэмэгдүүлэх, цаасгүй, төрийн үйлчилгээг түргэн шуурхай, хүртээмжтэй, хүнд сурталгүй хүргэх зорилгоор цахим системд шилжсэн.

Программын хэрэглэгч талуудад төрийн байгууллага, оператор, иргэн, төрийн байгууллагын удирдлага болон тухайн байгууллагын дээд шатны удирдлага багтаж байгаа бөгөөд тус систем нь иргэдийн санал хүсэлт, өргөдөл гомдлыг дуудлага, биечлэн, мессеж, мобайл, веб сайт зэрэг 10 сувгаар хүлээн авч бүртгэн, холбогдох байгууллагад уламжлан, шийдвэрлэлтэд хяналт тавьж ажилладаг. Тухай бүр шаардлагатай тайлан, мэдээ, мэдээллээр Засгийн газар, яам, агентлагуудыг хангаж, өнөөгийн байдлаар тус системд төрийн байгууллага холбогдон иргэдийн санал хүсэлт, өргөдөл гомдлыг хүлээн авч, шийдвэрлэж байна.

Энэхүү иргэд зориулагдсан гар утасны аппликэйшнг Засгийн газрын Хэрэг эрхлэх газрын захиалгаар Дэлхийн банкны санхүүжилтээр Ухаалаг засаг төслийн хүрээнд бүтээв.